Ostre hamowanie w ROWie: Rylacja ze szpilu ROW 1964 Rybnik – Ruch Chorzów

Skład Ruchu bōł sporym zaskoczyniem. Na lewyj stronie łobrony zagrôł Będzieszak, a na prawym krzidle Mateusz Winciersz.

Gospodorze majôm tyn sezon słaby, a Ruch musiôł to wykorzistać i zacon ze srogigo „C”. Fajnie my rozgrywali bala i we efekcie, we 18 minucie niy bōło czego zbiyrać. Bala poszła do Mateusza Duchowskiego, kiery fajnym szczałem, trocha nad ziymiom wpakowôł bala do nyca. Eins!

Plan gospodorzy na szpil bōł prosty. Laga na przodek i walka ło bala we kepkach, ale kożdo niyudano bala łod razu rodziōła łokazjo do szibkij akcji Ruchu. We efekcie, do pauzy moglimy wygrywać 3-0! Trocha żol łokazji jakie stworzōł Fosa, kiery uderzōł trocha kole supka, a potyn Będzieszak, kiery dzisiej bōł we łobronie, ale grôł fest ze przodka.

Drugô połowa szpilu to nostympne łokazje Ruchu i lagi ROWu. Gospodorze czynścij wykorzistywali Krotofila, kiery miôł para we łapach i kôżdy wyciep ze ausu bōł tak mocny, jak cyntra ze eku, ale mimo łokazji, we torze broniōł bardzo pywnie Jakub Bielecki.

We 53 minucie poszła bala do Idzika, kiery trocha sie pościgoł ze łobrońcom gospodorzy i szczyloł. Bala po lacie wlazła do tora! ZWEI!

Modre côłki czos kontrolowali gra, a ROW niy miôł innych wariantów na tyn szpil. Kôżdo bala kiero wszczylali we nosz elwer to my fajnie kasowali. Nawet jak gra sie zaostrzôła – tukej warto łodnotować, że kartka chyciōł Kawula, kiery po zybraniu 4 kartek niy zagro we szpilu ze Stalą Brzeg za tydziyń. Żol łokazji Winiego sôm na sôm, kaj torman ROWu łodbiōł bala na ek i łokazji Idzika – położōł Paszka na zol, ale uderzōł we boczno siatka.

Przewidywali my łatwy szpil i poniykônd taki łon bōł. Po szpilu kybice ROWu łostro pociśli po swoich ulubiyńcach, a Ci… no zaliczyli ostre hamowanie we rowie.

Nôsz plus szpilu: Trocha może sie niy zgodzicie, ale mômy swoje argumynty. Piotr Kwaśniewski! Côłko piyrwszo połowa to zagrożynie ze lewyj sztrony, kaj biegôł Kwaśny. Grôł bardzo dobry szpil, zaliczōł sporo dobrych podań i czynsto bōły to podania łotwiyrajōnce droga do tora. Uważômy, że dzisiej fest zasłużoł na plusa szpilu.

Warto tyż wspomniyć trocha ło kybicach, kierzi dziynki wsparciu GKSu Katowice i Górnika Zabrze mogli trocha poryceć, ale… bez 60 minut – bo wiyncyj nie ryceli – słuchołech 2 przyśpiywki dopingujônce ROW, a reszta to czisto hamówa (do kieryj tyn tytuł tyż nawiōnzuje) we kierunku Ruchu. Trocha to dziwne, że zamiast dopingować drużina, to sie spotyko ino coby ciepać obelgami na rywala. Niy nôm łocyniać wykonanie, ale Ruch zweryfikowoł kolyjny roz niy ino te sportowe aspekty rywala – po torze Idzika trybuny juz w zasadzie niy dopingowały, a połowa kybiców wylazła ze sztadionu.

ROW 1964 Rybnik – Ruch Chorzów 0-2 (0-1)

Skład ROWu: Kewin Paszek – Pacholski, Kukuła, Krotofil, Vasil, Jary, Pochcioł, Kuczera, Folmert, Wodecki, Niedźwiedzki.

Skład Ruchu: Bielecki – Będzieszak, Kawula, Kulejewski, Kwaśniewski – Winciersz, Sikora, Duchowski, Janoszka, Foszmańczyk – Idzik.

Tory: 18 min. Duchowski, 53 min. Idzik.

Ciekawostki: Idzik szczelōł swojigo 12 tora we lidze, zagrôł 10 szpilów. Duchowski szczelōł piyrwszego tora ligowygo do Ruchu.

---

Autor: Dawid Godziek / Życie na Niebiesko